Uummannap kommuniani Maarmorilimmi aqerlumik zinkimillu piiaanerup unitsinneqarneraniit ukiut 20-ingajaat kingorna kangerluit nunatallu piiaaffiusimasup eqqaaniittut saffiugassanit suli mingutsitaapput. Tassa tamatuma eqqaani avatangiisinik misissuisarsimanernit paasisat pillugit nalunaarusiap Danmarkimi Avatangiisinik Misissuisoqarfiup (DMU) Aarhus Universitimiittup saqqummersitaani atuarneqarsinnaasut. Misissuisarnerit nunatsinni aatsitassanut pisortaqarfimmit aningaasalersugaapput.

Af Steen Voigt

Uummannap kommuniani Maarmorilimmi aqerlumik zinkimillu piiaanerup unitsinneqarneraniit ukiut 20-ingajaat kingorna kangerluit nunatallu piiaaffiusimasup eqqaaniittut saffiugassanit suli mingutsitaapput. Tassa tamatuma eqqaani avatangiisinik misissuisarsimanernit paasisat pillugit nalunaarusiap Danmarkimi Avatangiisinik Misissuisoqarfiup (DMU) Aarhus Universitimiittup saqqummersitaani atuarneqarsinnaasut. Misissuisarnerit nunatsinni aatsitassanut pisortaqarfimmit aningaasalersugaapput.

Taratsup, marraap, naasut uumasullu aqerloqassusiinik zinkeqassusiinillu ukiuni qassiini misissuisarnikkut Maarmorillup eqqaata avatangiisai misissuiffigineqartarput. Nalunaarusiaq ”Environmental monitoring af the lead-zinc mine in Maarmorilik, Nortwest Greeland, 2007” 2007-imi misissuinernik saqqummiiffiuvoq aammalu siusinnerusukkut misissuisarnernut sanilliussiffiulluni.

Imaq aatsitassarsiorfiup 1990-imi ingerlajunnaarneraniilli mingutsinneqannginnerulersimaqaaq. Maanna eqqakkat Affarlikassaanut eqqarneqarsimasut aqerlumik immaarannguaannaq aniatitsilersimagaluartut zinkimik suli aniasoqarpoq, kisiannili aatsitassarsiorfiup ingerlagallarneraniit annikinneerarsuarmik. Kangerlummi immap naqqata aqerloqarnera 2007-imi 1988-1989-imut sanilliullugu 1000-eriaataata missaannik annikinneruvoq.

Maarmorillup eqqaani kangerlunni aqerloqarnerata qaffasinnera tamaani najugaqartunit, aalisakkanik allanillu nerisaqartartuusunit, aarlerinartoqartinneqartarpoq. 2007-imi misissuinerit takutippaat aqerloq killigititaasartunit atuuttunit appasinnerulersimasoq uillut Affarlikassaani Qaamarujummilu kiisalu tamatuma kitaani ittut eqqaasanngikkaani. Taamaammat uillut taakkunaniittut nerineqarnissaat kajumissaarutigineqanngilaq.

Ilisimatooq Pilersaarutit naapertorlugit aatsitassarsiortitseqatigiiffiup “Black Angel Mining Ltd.”-ip Maarmorilimmi aatsitassarsiorfik 2009-imi ammaqqissavaa. Aatsitassarsiortitseqatigiiffiup aatsitassarsiorfimmi pissutsit 2005-imi misissoriartorpai. Assi qaqqami ”Inngili Qernertumi” qaarusuup ammarnganiit immamiit 600 meterinit qatsissusilimmiit assilisaavoq. Aatsitassarsiorfik ingerlagallarami kaabilersuartigut 1500 meteriusutigut ingerlaarutit nivingasut atorlugit qeqertaasamut Maarmorilimmut (assip naqqaniittumut) atassuteqarpoq, tassungalu akuiagassanngortut ingerlanneqartarput suliarineqariarlutillu aallarunneqartarlutik. Kangerluk Qaamarujuk assip talerpiata tungaaniittoq imavimmut atavoq. Imartaq assip naqqaniittoq tassaavoq kangerluk Affarlikassaa. Assi: Black Angel Mining Ltd. ©

Poul Johansen, DMU-meersoq ima oqarpoq:

”Tamatuma eqqaata zinkimik aqerlumillu suli mingutsitaanerat 2007-imi misissuinertigut paasineqarsimavoq. Ukiulli qassiit ataatsimut isigaanni mingutsitsineq malunnavissumik appariarsimavoq, pingaartumik aatsitassarsiorfiup 1990-imi ingerlajunnaarnerata kingornagut. Aqerlumik zinkimillu mingutsitsiviusut annikilliartuinnarput, maannalu Affarlikassaa Qaamarujullu kisimik malussarfiusalersimallutik.”

Aatsitassarsiorfiup ammaqqinneqarnissaa aamma pilersaarutaavoq. Aatsitassarsiortitseqatigiiffiup ”Black Angel Mining Ltd.”-ip tuluit nunaanneersup tamaani aatsitassassarsiornissamut Namminersornerullutik Oqartussaniit akuerineqarsimasup naatsorsuutigaa akuiagassamik piiaaneq 2009-imi aallartissinnaassallugu.

Attavissaq: Ilisimatooq Gert Asmund, tlf. +45 4630 1925, gas@dmu.dk

Environmental monitoring at the lead-zinc mine in Maarmorilik, Northwest Greenland, 2007. Johansen P., Asmund, G., Rigét, F. & Johansen, K. 2008. National Environmental Research Institute, University of Aarhus, 54 pp. – NERI Technical Report No. 684. Sammenfatning | Summary | Eqikkaaneq | Hele rapporten pdf-inngugaq  (3.795 kB)

Årgang 12 nr. 17, 11. september 2008